Tafsiri ya surat Al-Haqqa

Ilishuka Makka

Kwa jina la Mwenyezi Mungu, Mwingi wa rehema, Mwingi wa kurehemu.

1. Tukio la haki. 2. Nini hilo Tukio la haki? 3. Na nini kitakujulisha nini hilo Tukio la haki? 4. Thamudi na A'di waliukadhibisha Msiba unaositusha. 5. Basi Thamudi waliangamizwa kwa balaa kubwa mno. 6. Na ama A'di waliangamizwa kwa upepo mkali usiozuilika. 7. Aliowapelekea masiku saba, na siku nane, mfululizo bila ya kusita. Utaona watu wamepinduka kama kwamba ni magongo ya mitende yaliyo wazi ndani. 8. Basi je! Unamwona mmoja wao aliyebaki?

# {1 - 3} "Tukio la haki" ni katika majina ya Siku ya Kiyama; kwa sababu ni la kweli na litateremka juu ya viumbe, na ndani yake uhakika wa mambo na yale yote yaliyofichika ya vifuani yatadhihirika. Kwa hivyo Mwenyezi Mungu akaitukuza hadhi yake na kuifanya kuwa kubwa mno kwa kurudia suala hili katika kauli yake: “Tukio la haki. Nini hilo Tukio la haki? Na nini kitakujuulisha nini hilo Tukio la haki?” Kwani ni jambo kubwa na lina mahangaiko makubwa. “Na katika ukuu wake ni kwamba Mwenyezi Mungu aliangamiza mataifa yaliyoikanusha kwa adhabu ya haraka.”

# {4} Kisha akataja mfano wa hali zao zilizomo duniani na zinazoonekana humo, na hayo ni yale aliyowafikishia ya adhabu kali kwa mataifa walioasi, na akasema: "Thamudi na A'di waliukadhibisha." Hao ni makabila yanayojulikana, watu waliokuwa wakiishi Al-Hijr, ambao Mwenyezi Mungu aliwatumia Mtume wake, Saleh, amani iwe juu yake, ili awakataze shirki waliyokuwamo na awaamrishe kumpwekesha, lakini waliukataa mwito wake, wakamkadhibisha, na wakakanusha aliyoyasema kuhusu Siku ya Kiyama, ambayo ni tukio kuu litakaliowatisha sana viumbe kwa vitisho vyake. Basi wakakadhibisha A'di wa kwanza, watu waliokuwa wakiishi Hadhramaut, Mwenyezi Mungu alipomtuma kwao Mtume wake Hud, rehema na amani ziwe juu yake, akiwalingania kumwabudu Mwenyezi Mungu peke yake, nao wakamkadhibisha na kuyakanusha yale aliyoyaeleza kuhusu kufufuliwa, kwa hivyo Mwenyezi Mungu akayaangamiza makundi hayo yote mawili kwa maangamizo ya haraka.

# {5} "Basi Thamudi waliangamizwa kwa balaa kubwa mno." Nao ni ule ukelele mkubwa wa kutisha uliozipasua nyoyo zao na kuzichukua roho zao, na wakawa wafu huku hayaonekani isipokuwa majumba yao na miili yao iliyokufa.

# {6} "Na ama A'di waliangamizwa kwa upepo mkali usiozuilika." Yaani, upepo mkali, wenye nguvu ambao una sauti kubwa kuliko radi "usiozuilika." Yaani, haukuzuilika hata kwa walinzi wake kulingana na wasemavyo wafasiri wengi, au haukuweza kuzuilika dhidi ya akina A'di, na ukavuka mipaka, kama ilivyo kauli sahihi.

# {7} "Aliowapelekea masiku saba, na siku nane, mfululizo bila ya kusita." Yaani, katika muda huu wa balaa mbaya na shari iliyowapata na kuwaangamiza. "Utaona watu wamepinduka" Yaani, wameangamia wamekufa "kama kwamba ni magongo ya mitende yalio wazi ndani" yakaangukiana yenyewe kwa yenyewe.

# {8} "Basi je! Unamwona mmoja wao aliyebaki?" Hii ni mbinu ya kuuliza yenye maana ya kukanusha jambo linalojulikana tayari.

9. Na Firauni na waliomtangulia, na miji iliyopinduliwa chini juu, walileta khatia. 10.Wakamuasi Mtume wa Mola wao Mlezi, ndipo Yeye Mola akawakamata kwa mkamato uliozidi nguvu. 11. Maji yalipofurika Sisi tulikupandisheni katika safina. 12. Ili tuyafanye hayo kuwa ni waadhi kwenu na kila sikio linalosikia liyahifadhi.

# {9 - 10} Yaani, vile vile walikuja madhalimu waasi wakubwa wengine wasiokuwa hawa wawili madhalimu, Adi na Thamud, kama vile Firauni wa Misri ambaye Mwenyezi Mungu alimtumia mja wake na Mtume wake Musa bin Imran, rehema na amani ziwe juu yake, na akawaonyesha ishara zilizo wazi ambazo wangeweza kwazo kuwa na yakini juu ya haki, lakini walikadhibisha, wakakukufuru, wakadhulumu na wakafanya kiburi, na wakaja kabla yake wakadhibishaji "na miji iliyopinduliwa chini juu." Yaani, vijiji vya watu wa Lut'i. Hao wote walikuja "walileta khatia." Yaani, vitendo vilivyopindukia. Navyo ni ukafiri, ukanushaji, dhuluma, ukaidi, na aina zote za dhambi na uchafu uliofungamana na hayo. "Wakamuasi Mtume wa Mola wao Mlezi" kwa hivyo, Mwenyezi Mungu akawakamata "kwa mkamato uliozidi nguvu" na kipimo, ambao ulisababisha kuangamia kwao.

# {11 - 12} Miongoni mwao ni kaumu ya Nuhu; Mwenyezi Mungu aliwazamisha baharini maji yalipoufunika uso wa ardhi na kupanda juu ya sehemu zake zilizoinuka juu, na Mwenyezi Mungu akawaneemesha viumbe waliokuwepo baada yao kwamba - aliwachukua "katika kinachokwenda,", ambacho ni safina, walipokuwa katika viuno vya baba zao na mama zao, ambao Mwenyezi Mungu aliwaokoa. Basi mhimidini Mwenyezi Mungu, na mumshukuru yule aliyekuokoeni alipowaangamiza madhalimu, na zizingatieni Aya zake na ishara zake zinazonyesha upweke wake, na ndiyo maana akasema: "Ili tuyafanye hayo" Yaani, safina hiyo na mfano huo kuwa ni "waadhi kwenu " atakaokukumbusheni safina ya mwanzo iliyojengwa na kisa chake, na jinsi Mwenyezi Mungu alivyowaokolea humo wale waliomuamini na wakamfuata Mtume wake, na akawaangamiza watu wote waliokuwa kwenye ardhi. Kwa maana kitu sawia kinakumbusha asili yake. Na kauli yake: "Na kila sikio linalosikia liyahifadhi." Yaani: wenye akili wayafahamu, na wayajue makusudio yake na vipi ya kuyatumia kuwa ni ishara. Haya ni tofauti na watu wanaopeana mgongo, walioghafilika, watu wagumu wasio na akili ya utambuzi. Kwani wao hawafaidiki na Ishara za Mwenyezi Mungu. Kwa sababu wao hawaelewi kitu kutoka kwa Mwenyezi Mungu na hawazifikirii ishara zake.

13. Na litapopulizwa barugumu mpulizo mmoja tu. 14. Na ardhi na milima ikaondolewa, na ikavunjwa kwa mvunjo mmoja. 15. Siku hiyo ndio Tukio litatukia. 16. Na mbingu zitapasuka, kwani siku hiyo zitakuwa dhaifu kabisa. 17. Na Malaika watakuwa pembezoni mwa mbingu; na wanane juu ya hawa watakuwa wamebeba Kiti cha Enzi cha Mola wako Mlezi. 18. Siku hiyo mtahudhurishwa - haitafichika siri yoyote yenu.

# {13 - 18} Mwenyezi Mungu Mtukufu alipotaja aliyowafanyia wale waliokadhibisha Mitume wake, na jinsi alivyowalipa, na akawaharakishia adhabu yao katika dunia, na kwamba Mwenyezi Mungu aliwaokoa Mitume na wafuasi wao, huu ukawa ni utangulizi wa malipo ya kiakhera na utimilifu wa matendo kamili Siku ya Kiyama. "Na litakapopulizwa barugumu mpulizo mmoja tu" - wakati miili itakapokuwa imeota kikamilifu - kwa mpulizo mmoja, hapo roho zitatoka, kisha kila roho itaingia ndani ya mwili wake. Na tazama, watu wote watakuwa tayari wamemsimamia Mola Mlezi wa walimwengu wote. "Na ardhi na milima ikaondolewa, na ikavunjwa kwa mvunjo mmoja." Yaani, hivyo vyote vitakuwa tambarare, uwanda. Hutaona humo mdidimio wala muinuko. Hivyo ndivyo itakavyofanywa ardhi na vyote vilivyo juu yake. Na ama mbingu, hizo zitafadhaika, kutikisika na kupasuka - na rangi yake itabadilika, na kuwa dhaifu kabisa baada ya uimara na nguvu zake kubwa, na hayo si kwa sababu ya lolote ila ni kwa sababu ya jambo kubwa lililozisumbua, na balaa kubwa mno iliyozidhoofisha mno. "Na malaika" watukufu "watakuwa pembezoni mwa mbingu" huku wamemnyenyekea Mola wao Mlezi, watiifu kwa ukuu wake; "na wanane juu ya hawa watakuwa wamebeba Kiti cha Enzi cha Mola wako Mlezi." Nao ni malaika wenye nguvu kubwa zaidi. Wakati atakapokuja kwa ajili ya kutenganisha kati ya waja na kuhukumu baina yao kwa uadilifu wake na fadhila zake, na ndiyo maana akasema: "Siku hiyo mtahudhurishwa" kwa Mwenyezi Mungu, "haitafichika siri yoyote yenu." Siyo katika miili yenu na dhati zenu wala katika vitendo vyenu na sifa zenu. Kwani Mwenyezi Mungu Mtukufu anajua ya ghaibu na yanayoonekana. Na waja watakusanya bila viatu, uchi na bila ya kutahiriwa, kwenye ardhi tambarare ambayo ataweza kuwasikilizisha mwitaji, na ataweza kuwaona mtazamaji, na hapo atawalipa kwa yale waliyofanya, na ndiyo maana akataja namna yatakavyokuwa malipo hayo, akasema:

19. Basi ama atakayepewa kitabu chake kwa mkono wake wa kulia, atasema: Haya someni kitabu changu! 20. Hakika nilijua ya kuwa nitapokea hisabu yangu. 21. Basi yeye atakuwa katika maisha ya kupendeza. 22. Katika Bustani ya juu. 23. Matunda yake ya karibu. 24. Waambiwe: Kuleni na mnywe kwa furaha kwa sababu ya mlivyotanguliza katika siku zilizopita.

# {19 - 20} Na hawa ndio watu watakaopata furaha. Wanapewa vitabu vyao vilivyo na matendo yao mema kwa mikono yao ya kulia, ili kuwapambanua, kuashiria hadhi zao nzuri na kuinua hadhi yao, na hapo mmoja wao atasema kwa sababu ya furaha kubwa na huku wakipenda kwamba viumbe wote wajue ni nini Mwenyezi Mungu amewaneemesha kwacho cha utukufu. "Haya someni kitabu changu!" Kwani kinanibashiria mabustani ya mbinguni, aina mbalimbali za mambo matukufu, maghufira ya dhambi na kusitiriwa kasoro, na kile kilichonifikisha katika haya ni yale ambayo Mwenyezi Mungu alinineemesha kwayo ya kuamini ufufuo, kuulizwa juu ya matendo, na kujiandaa kwa ajili yake kwa matendo mema yawezekanayo. Ndiyo maana akasema: "Hakika nilijua ya kuwa nitapokea hisabu yangu."

# {21 - 24} "Basi yeye atakuwa katika maisha ya kupendeza." Yaani, yanayokusanya yale yanayotamaniwa na nafsi na yale ambayo macho yanayafurahia, na tayari waliridhika nayo na wala hawataki kuchagua chochote badala yake. "Katika Bustani ya juu" Yaani: nyumba na majumba yaliyoinuka juu sana. "Matunda yake yakaribu." Yaani matunda yake ni miongoni mwa aina za matunda yaliyo karibu na yaliyo mepesi sana kwa watu wake kuyachuma huku wakiwa wamesimama, wamekaa, na wameegemea, na wataambiwa kwa heshima: "Kuleni na mnywe" kutoka katika kila chakula kitamu na kinywaji kitamu, "kwa furaha" kikamilifu bila ya kero wala usumbufu wowote. Na mlipewa malipo hayo "kwa sababu ya mlivyotanguliza katika siku zilizopita" miongoni mwa matendo mema - na kuacha matendo maovu - kama vile Swala, saumu, sadaka, Hijja, kuwafanyia mema viumbe, kumkumbuka Mwenyezi Mungu na kumgeukia. Kwa hivyo, Mwenyezi Mungu aliyafanya matendo kuwa ni sababu ya kuingia katika bustani za mbinguni, na kiini cha furaha yake, na msingi wa furaha yake.

25. Na ama atakayepewa kitabu chake katika mkono wake wa kushoto, basi yeye atasema: Laiti nisingelipewa kitabu changu! 26. Wala nisingelijua nini hisabu yangu. 27. Laiti mauti ndiyo yangelikuwa ya kunimaliza kabisa. 28. Mali yangu hayakunifaa kitu. 29. Madaraka yangu yamenipotea. 30. (Pasemwe): Mshikeni! Mtieni pingu! 31. Kisha mtupeni Motoni! 32. Tena mtatizeni katika mnyororo wenye urefu wa dhiraa sabini! 33. Kwani huyo hakika alikuwa hamuamini Mwenyezi Mungu Mtukufu. 34. Wala hahimizi kulisha masikini. 35. Basi leo hapa hana jamaa wa kumwonea uchungu. 36. Wala hana chakula ila usaha wa watu wa Motoni. 37. Chakula hicho hawakili ila wakosefu.

# {25-29} Hawa ndio watu wa mashakani. Watapewa vitabu vyao vyenye matendo yao maovu kwa mkono wao wa kushoto, ili kuwapambanua, kufedheha, na mmoja wao atasema kwa sababu ya wasiwasi yake kubwa na huzuni, "Laiti nisingeli pewa kitabu changu!" Kwa sababu kinanibashiria kuingia Motoni, na kwamba nitapata hasara ya milele. Natamani "nisingelijua nini hisabu yangu" nikawa nilisahaulika kabisa, na wala hata nisingefufuliwa ndiyo nikaulizwa hivi juu ya matendo yangu. "Laiti mauti ndiyo yangelikuwa ya kunimaliza kabisa." Yaani, laiti kifo changu kingekuwa ndicho kifo ambacho hakuna kufufuliwa baada yake. Kisha akageukia mali yake na mamlaka aliyokuwa nayo. Tazama, vyote hivyo vikawa ni msiba juu yake hakujitangulizia katika hivyo kwa ajili ya akhera yake, na wala havitomfaa chochote ikiwa atavitoa kwa ajili ya kukomboa kwavyo kutokana na adhabu. Hapo atasema: "Mali yangu hayakunifaa kitu" si katika dunia - kwa sababu sikujitangulizia ndani yake kitu - wala katika Akhera, na tayari wakati wa manufaa yake umeshapita. "Madaraka yangu yamenipotea." Yaani, yameondoka na kutoweka, na wala hawakuninufaisha kitu askari wala wingi (wa mali au wasaidizi) wala maandalizi ya hali ya juu wala heshima kubwa. Bali, yote hayo yalitoweka pamoja na upepo bure kabisa, biashara za faida zikatoweka kwa sababu yake, na badala yake zikaja wasiwasi kubwa, machungu na huzuni.

# {30 - 37} Basi hapo itaamrishwa aadhibiwe, na wataambiwa Zabaniya wagumu na wakali mno: “Mshikeni! Mtieni pingu! Kisha mtupeni Motoni!" Yaani, mgeuzeni juu ya makaa yake na miale ya moto wake. "Tena mtatizeni katika mnyororo wenye urefu wa dhiraa sabini" katika minyororo ya ya Motoni ambayo itakuwa moto sana kisha "mtatizeni." Yaani, iingizieni kwenye njia ya haja kubwa na itokee mdomoni mwake, na aning'inizwe humo asalie akiadhibiwa kwa adhabu hii mbaya zaidi. Basi hii ndiyo adhabu na mateso mabaya zaidi, na ni majuto makubwa magani haya, makemeo na lawama! Kwani sababu iliyomfikisha mahali hapa "ni kuwa hakika alikuwa hamuamini Mwenyezi Mungu Mtukufu" kwa maana alikuwa ni mwenye kumkufuru Mola wake Mlezi na kuwapinga Mitume wake, akiikataa haki waliyoileta, "wala hahimizi kulisha masikini." Yaani, hakuwa na rehema ndani ya moyo wake ya kuwaonea huruma maskini na wahitaji. Kwa hivyo, hakuwa akiwalisha katika mali zake mwenyewe, wala hakuwa akiwahimiza wengine kuwalisha. Kwa kuwa hakuwa na cha msukumo wa kufanya hivyo moyoni mwake. Haya ni kwa sababu chanzo cha furaha ni vitu viwili: kumkusudia Mwenyezi Mungu peke yake, jambo ambalo msingi wake ni kumuamini Mwenyezi Mungu, na kuwafanyia wema viumbe wa aina zote za wema, ambao mkubwa wake zaidi ni kuzuia mahitaji ya masikini kwa kuwalisha vile wanavyoweza kupata nguvu. Nao watu hawa hawamkusudii Mwenyezi Mungu peke yake wala hawafanyi wema, ndiyo maana wakastahili kile walichostahili. "Basi leo" siku ya Kiyama, "hana jamaa wa kumwonea uchungu" na kumfanyia uombezi ili aepuke adhabu ya Mwenyezi Mungu au apate malipo yake mazuri. "Wala uombezi mbele yake hautafaa kitu, isipokuwa kwa aliyempa idhini" na akasema "Madhalimu hawatakuwa na rafiki, wala mwombezi wa kuitikiwa." Na wala hatakuwa "na chakula ila usaha wa watu wa Motoni." Nao utakuwa moto sana, mchungu, wenye harufu mbaya, na wenye ladha mbaya, na hatakila chakula hicho cha kuchukiza mno "ila wakosefu" walioikosa njia iliyonyooka, na wakashika kila njia inayowafikisha kwenye Jahannamu; basi ndiyo wakastahiki adhabu iumizayo.

38. Basi ninaapa kwa mnavyoviona. 39. Na msivyoviona. 40. Kwa hakika hii ni kauli iliyoletwa na Mjumbe mwenye heshima. 41. Wala si kauli ya mtunga mashairi. Ni machache sana mnayoyaamini. 42. Wala si kauli ya kuhani. Ni machache mnayoyakumbuka. 43. Ni uteremsho utokao kwa Mola Mlezi wa walimwengu wote. 44. Na lau kama angelituzulia baadhi ya maneno tu. 45. Bila ya shaka tungelimshika kwa mkono wa kulia. 46. Kisha kwa hakika tungelimkata mshipa mkubwa wa moyo! 47. Na hapana yeyote katika nyinyi ambaye angeliweza kutuzuia. 48. Kwa hakika hii ni mawaidha kwa wacha Mungu. 49. Na hakika Sisi bila ya shaka tunajua kwamba miongoni mwenu wapo wanaokadhibisha. 50. Na hakika bila ya shaka itakuwa ni majuto kwa wanaokataa. 51. Na hakika hii bila ya shaka ni haki ya yakini. 52. Basi litakase jina la Mola wako Mlezi Mtukufu.

# {38 - 43} Mola Mtukufu aliapa kwa vitu vyote vinavyoviona viumbe na visivyoviona, basi viumbe vyote vikajumuishwa katika hilo, na hata nafsi yake tukufu ikajumuishwa katika hilo, kwamba Mtume alikuwa mkweli katika aliyoyaleta katika Qur-ani hii Tukufu, na kwamba Mtukufu Mtume - rehema na amani za Mwenyezi Mungu ziwe juu yake - aliifikisha kutoka kwa Mwenyezi Mungu Mtukufu, na Mwenyezi Mungu akamtakasa Mtume wake kutokana na yale ambayo maadui zake walimtuhumu kwayo kwamba yeye ni mtunga mashairi au mchawi, na kwamba yale yaliyowachochea kufanya hivyo ilikuwa ni ukosefu wao wa imani na kukumbuka. Lau wangeamini na kukumbuka yale yanayowafaa na yanayowadhuru, na katika hayo ni kuangalia hali ya Muhammad - rehema na amani za Mwenyezi Mungu ziwe juu yake - na kuangalia vyema tabia zake na maadili yake ili kuona kitu kama jua ambacho kitawaashiria kwamba hakika yeye ni Mtume wa Mwenyezi Mungu na kwamba aliyoyaleta ni “uteremsho unaotoka kwa Mola Mlezi wa walimwengu wote" ambao haufailii kuwa kauli kwa wanadamu. Bali ni maneno yanayoashiria ukubwa wa yule ambaye aliyazungumza, utukufu wa sifa zake, ukamilifu wa malezi yake juu ya viumbe, na kuinuka kwake juu ya waja wake. Na pia, haya ni wao kumdhania Mwenyezi Mungu mambo yasiyomfailia Mwenyezi Mungu na hekima yake.

# {44 - 47} "Na lau kama angelituzulia baadhi ya maneno tu. Bila ya shaka tungelimshika kwa mkono wa kulia. Kisha kwa hakika tungelimkata mshipa mkubwa wa moyo;" ambao ukikatwa, mtu anaangamia kwa sababu yake. Lau ingechukuliwa kuwa Mtume -Mungu apishe mbali - kasema dhidi ya Mwenyezi Mungu, basi angemharakishia adhabu na kumshika kama anavyoshika mwenye nguvu, mwenye uweza. Kwa sababu Yeye ni Mwenye hekima na Muweza mno wa kila kitu. Hekima yake inamtaka asimpe muda yule anayemsingizia uongo anayedai kuwa Mwenyezi Mungu amemruhusu kumwaga damu na mali za wale wanaompinga, na kwamba yeye na wafuasi wake wataokolewa, na yeyote anayempinga, basi yeye ndiye ataangamia. Kwa hivyo, ikiwa Mwenyezi Mungu alimsaidia Mtume wake kwa miujiza, na akathibitisha ukweli wa yale aliyoyaleta kwa ishara zilizo wazi, na akampa ushindi dhidi ya maadui zake, na akampa nguvu ya kukamata nywele zao za utosini, basi huo ndio ushuhuda mkuu zaidi kutoka kwake juu ya ujumbe wake. Na kauli yake: "Na hapana yeyote katika nyinyi ambaye angeliweza kutuzuia." Yaani, ikiwa atamhiliki, basi; Yeye mwenyewe hakujizuia, na hakuna aliyeweza kumzuia na adhabu ya Mwenyezi Mungu.

# {48} "Na kwa hakika hii," yaani: Qur-ani Tukufu, "ni mawaidha kwa wacha Mungu" kwayo wanakumbuka masilahi ya dini yao na dunia yao, kwa hivyo wanayajua na kuyafanyia kazi. Inawakumbusha itikadi ya dini, maadili yanayoridhiwa, na hukumu za kisheria, kwa hivyo wanakuwa miongoni mwa wanachuoni wanaofanyia matendo Mola wao Mlezi, waja wanaojua na maimamu walioongoka.

# {49} "Na hakika Sisi bila ya shaka tunajua kwamba miongoni mwenu wapo wanaokadhibisha" haya, na haya ndani yake kuna maonyo na ahadi ya adhabu kwa wanaokadhibisha, na kwamba atawaadhibu kwa kukadhibisha kwao adhabu kali mno.

# {50} "Na hakika bila ya shaka itakuwa ni majuto kwa makafiri." Kwani walipoikufuru na wakayaona yale aliyowaahidi, wakahuzunika sana kwa kuwa hawakuongoka kwayo na hawakufuata amri zake, kwa hivyo wakakosa malipo mazuri, wakapata adhabu kali zaidi, na yakakatika mafungamano yao.

# {51} "Na hakika hii bila ya shaka ni haki ya yakini" juu ya viwango vya elimu. Kwani viwango vya juu kabisa vya elimu ni yakini, ambayo ni elimu thabiti isioyumba wala kuondoka. Nayo yakini ina viwango vitatu, kila kimoja ni cha juu zaidi kuliko cha kabla yake: cha kwanza ni elimu ya yakini, ambayo ni elimu inayopatikana kutokana na habari. Kisha jicho la yakini, ambayo ni elimu inayopatikana kwa kuona kwa macho. Kisha haki ya yakini, ambayo ni elimu inayopatikana kwa hisia ya ladha na kugusana nayo. Na hii Qur-ani ni yenye maelezo haya. Kwa maana elimu iliyomo ndani yake inayoungwa mkono na uthibitisho wa kukata na mambo ya uhakika na elimu ya kiimani iliyo ndani yake anayopata mwenye kuionja ni haki ya yakini.

# {52} "Basi litakase jina la Mola wako Mlezi Mtukufu" kutokana na yale yasiyoufailia utukufu wake, na mtakase kwa kutaja sifa za utukufu wake, uzuri wake na ukamilifu wake.

Imekamilika tafsiri ya Surat Al-Haqqa, na sifa njema zote ni za Mwenyezi Mungu, Mola Mlezi wa walimwengu wote.

****