Tafsiri ya Surat Ash-Shams

Ilishuka Makka

1. Ninaapa kwa jua na mwangaza wake! 2. Na kwa mwezi unapolifuatia! 3. Na kwa mchana unapolidhihirisha! 4. Na kwa usiku unapolifunika! 5. Na kwa mbingu na kwa aliyeijenga! 6. Na kwa ardhi na kwa aliyeitandaza! 7. Na kwa nafsi na kwa aliyeitengeneza! 8. Kisha akaifahamisha uovu wake na wema wake. 9. Hakika amefanikiwa aliyeitakasa. 10. Na hakika amehasiri aliyeiviza. 11. Kina Thamudi walikadhibisha kwa sababu ya upotofu wao. 12. Aliposimama mwovu wao mkubwa. 13. Hapo Mtume wa Mwenyezi Mungu alipowaambia: Huyu ni ngamia wa Mwenyezi Mungu, mwacheni anywe maji fungu lake. 14. Lakini walimkadhibisha na wakamchinja ngamia, kwa hivyo Mola wao Mlezi aliwaangamiza kwa sababu ya dhambi zao na akawafuta kabisa. 15. Wala Yeye haogopi matokeo yake.

# {1 - 6} Mwenyezi Mungu Mtukufu aliapa kwa ishara hizi kubwa juu ya nafsi iliyofanikiwa na nafsi nyinginezo ambazo ni ovu, akasema: "Ninaapa kwa jua na mwangaza wake" na manufaa yake yatokayo humo. "Na kwa mwezi unapolifuatia" katika mashukio na nuru. "Na kwa mchana unapolidhihirisha!" Yaani unapodhihirisha na kuweka wazi vitu vilivyo juu ya uso wa ardhi. "Na kwa usiku unapolifunika." Yaani, unapofunika uso wa ardhi, kwa hivyo kila kilicho juu yake kinakuwa gizani. Basi mfuatano wa giza, nuru, jua na mwezi juu ya ulimwengu huu kwa mpangilio nzuri sana na kusimama sawaswa kwa masilahi ya waja ni ushahidi mkubwa zaidi kwamba Mwenyezi Mungu ndiye ajuaye zaidi kila kitu, na ni Mwenye uwezo mno juu ya kila kitu, na kwamba Yeye pekee ndiye anayepasa kuabudiwa, ambaye kila kitu kingine kinachoabudiwa ni batili. "Na kwa mbingu na kwa aliyeijenga" Hapa inawezekana kwamba Mwenyezi Mungu aliapa kwa mbingu na aliyeijenga, ambaye ni Mwenyezi Mungu Mtukufu mwenyewe. Na inawezekana kwamba aliapa kwa mbingu na kujengwa kwake, ambako ndicho kipimo cha mwisho zaidi cha uundaji wa ustadi na uzuri. Na mfano wa hili ni kauli yake: "Na kwa ardhi na kwa aliyeitandaza" ili viumbe viweze kunufaika kwayo katika nyanja zote za manufaa.

# {7 - 8} "Na kwa nafsi na kwa aliyeitengeneza sawasawa!" Inawezekana kwamba kinachokusudiwa hapa ni nafsi za wanyama wote. Hili linaungwa mkono na ujumla huu, na pia inawezekana kwamba kiapo hiki kinahusiana na mtu ambaye yeye ndiye aliyejukumishwa kisheria, kwa ushahidi wa yale yanayokuja baada yake. Kwa hivyo, nafsi ni ishara kubwa katika ishara zake zinazostahiki kuapa kwazo. Kwani imefichikana na ni nyepesi zaidi, ni yenye kusonga kwa harakati za wepesi mno, na kubadilika, kuathirika, na kuwa na mihemko ya kisaikolojia kama vile wasiwasi kubwa, utashi, nia, upendo na chuki. Na kama haingekuwa hiyo, basi mwili ungekuwa tu sanamu isiyo na maana, na kuitengeneza sawasawa kama ilivyo ni moja katika ishara kuu za Mwenyezi Mungu.

# {9 - 10} Na kauli yake: "Hakika amefanikiwa aliyeitakasa" kutokana na madhambi, kasoro, na akaipandisha kwa kumtii Mwenyezi Mungu, na akaiinua juu kwa elimu yenye manufaa na matendo mema. "Na hakika amekhasiri aliyeiviza." Yaani, aliificha nafsi yake kwa kuichafua kwa machafu na kuwa karibia na kasoro na madhambi, kuacha yale yanayoikamilisha na kuikuza.

# {11 - 15} "Kina Thamudi walikadhibisha kwa sababu ya upotofu wao" wakaacha haki na wakamuasi Mtume wao. "Aliposimama mwovu wao mkubwa" ambaye ni Qudar bin Salif ili amchinje walipokubaliana juu ya hilo na wakamuamuru awafanyie hivyo. "Hapo Mtume wa Mwenyezi Mungu" Salih, amani ziwe juu yake, "akawaambia" akionya "Huyu ni ngamia wa Mwenyezi Mungu, mwacheni anywe maji fungu lake." Yaani, jihadharini na kumuua ngamia wa Mwenyezi Mungu ambaye amekuwekeeni kuwa ni ishara kubwa, na wala msiipinge neema ya Mwenyezi Mungu iliyo juu yenu ya kukunywesheni maziwa yake kwa kumuua, lakini wakamkadhibisha Mtume wao Salih "na wakamchinja ngamia, kwa hivyo Mola wao Mlezi aliwaangamiza kwa sababu ya dhambi zao" kwa kuwatumia ukelele kutokea juu yao na mtetemeko wa kutokea chini yao, basi kulipokucha wakawa majumbani mwao kifudifudi, wala hakukuta miongoni mwao mwenye kuita wala mwenye kuitikia. "Na akawafuta kabisa. Wala Yeye haogopi matokeo yake." Na je, anawezaje kuhofu Yule ambaye ni mshindi na wala hakuna kiumbe kinachoweza kutosha katika ushindi wake wala uendeshaji wake, ambaye ni Mwenye hekima katika kila anachopanga na kukiweka kama sheria?

[Imekamilika, sifa njema ni za Mwenyezi Mungu].

* * *