Tafsiri ya Surat Al-A'la

Ilishuka Makka

Kwa jina la Mwenyezi Mungu, Mwingi wa rehema, Mwingi wa kurehemu

1. Litakase jina la Mola wako Mlezi aliye juu kabisa. 2. Aliyeumba, na akaweka sawa. 3. Na ambaye amekadiria na akaongoa. 4. Na aliyeotesha malisho. 5. Kisha akayafanya makavu, meusi. 6. Tutakusomesha wala hutasahau. 7. Ila akipenda Mwenyezi Mungu. Hakika Yeye anayajua yaliyo dhahiri na yaliyofichikana. 8. Na tutakusahilishia yawe mepesi. 9. Basi kumbusha, kama kukumbusha kunafaa. 10. Atakumbuka mwenye kuogopa. 11. Na atajitenga mbali nayo mpotovu. 12. Ambaye atauingia Moto mkubwa. 13. Tena humo hatakufa wala hawi hai. 14. Hakika amekwisha fanikiwa aliyejitakasa. 15. Na akakumbuka jina la Mola wake Mlezi, na akasali. 16. Lakini nyinyi mnahiari maisha ya dunia! 17. Na Akhera ni bora na yenye kudumu zaidi. 18. Hakika haya yamo katika Vitabu vya mwanzo. 19. Vitabu vya Ibrahimu na Musa.

# {1 - 3} Mwenyezi Mungu anaamuru atakaswe, jambo linalojumuisha kumkumbuka, kumuabudu, kunyenyekea kwa ajili ya utukufu wake na kujisalimisha kwa ukuu wake, na kwamba kuwe kumtakasa kunakoufailia ukuu wa Mwenyezi Mungu Mtukufu; kwa kutaja majina yake mazuri, yaliyo juu ya kila jina kwa maana zake kuu na tukufu, na kutaja matendo yake ambayo miongoni mwake ni kwamba aliumba viumbe na akawafanya kuwa sawasawa. "Na ambaye amekadiria na akaongoa." Huku ni kuongoza kwa jumla ambako ni kwamba aliongoza kila kiumbe kufikia mambo yenye masilahi yake.

# {4 - 5} Na kwamba zitajwe neema zake za kidunia, na ndiyo sababu akasema: "Na aliyeotesha malisho" Yaani aliteremsha maji kutoka mbinguni, na kwa hayo akaotesha aina mbalimbali za mimea na nyasi nyingi. Kwa hivyo watu, mifugo na wanyama wote wakala kwa hayo. Halafu baada ya kuikamilishia hali ya mwonekano wake mzuri zaidi, alinyausha mimea yake na akakausha nyasi yake "Kisha akayafanya makavu, meusi."

# {6 - 7} Na kwamba zitajwe humo neema zake za kidini. Na ndiyo maana Mwenyezi Mungu akataja asili na kiini cha neema hii ambayo ni Qurani, akasema: "Tutakusomesha wala hutasahau." Yaani, tutayahifadhi yale tuliyokuteremshia katika katika moyo wako, kwa hivyo hutasahau chochote humo. Na hii ni bishara kubwa kutoka kwa Mwenyezi Mungu kwa mja wake na Mtume wake Muhammad - rehema na amani za Mwenyezi Mungu ziwe juu yake - kwamba Mwenyezi Mungu atamfundisha elimu ambayo hataisahau. "Ila akipenda Mwenyezi Mungu" katika yale yatakayotakiwa na hekima yake kwamba akusahaulishe hayo kwa ajili ya masilahi na hekima ya kubwa. "Hakika Yeye anayajua yaliyo dhahiri na yaliyofichikana." Na katika hayo ni kwamba anajua yale yanayowafanya waja kutengenea. Ndiyo maana akawawekea sheria ya yale ayatakayo na kuhukumu anachotaka.

# {8} "Na tutakusahilishia yawe mepesi." Hii pia ni bishara njema kwamba Mwenyezi Mungu atamfanyia Mtume wake – rehema na amani za Mwenyezi Mungu ziwe juu yake - yawe mepesi katika mambo yake yote, na ataifanya sheria yake na dini yake kuwa nyepesi.

# {9 - 13} "Basi kumbusha" kwa Sheria ya Mwenyezi Mungu na Aya zake, "kama kukumbusha kunafaa." Yaani, maadamu ukumbusho huo unakubaliwa na mawaidha hayo yanasikiwa, hata kama kutapatikana kwa hayo yote anayokusudiwa au baadhi yake. Na maana isiyo ya moja kwa moja ya Aya hii ni kwamba ikiwa ukumbusho haufai; kwa njia ya kwamba yanaongeza maovu au yanapunguza mema, basi haitaamrishwa kufanya hivyo. Bali yatakuwa yamekatazwa. Kwa hivyo, watu wamegawanyika katika makundi mawili wakati wa ukumbusho: wale wanaonufaika nao na wasionufaika nao. Ama wale wanaonufaika, hao aliwataja kwa kauli yake: “Atakumbuka mwenye kuogopa" Mwenyezi Mungu. Kwa maana kumcha Mwenyezi Mungu na kujua malipo yake juu ya matendo inamlazimu mja kujiepusha na yale anayoyachukia Mwenyezi Mungu na kujitahidi kufanya mema. Na ama wasionufaika, aliwataja katika kauli yake: "Na atajitenga mbali nayo mpotovu. Ambaye atauingia Moto mkubwa" uliowashwa. Ambao utapanda nyoyoni. "Tena humo hatakufa wala hawi hai." Ataadhibiwa adhabu chungu bila ya kupumzishwa kiasi kwamba watatamani kufa. Lakini hilo pia hawatalipata, kama alivyosema Mwenyezi Mungu: "Hawahukumiwi wakafa, wala hawatapunguziwa adhabu yake."

# {14 - 15} "Hakika amekwisha fanikiwa aliyejitakasa" kutokana na ushirikina, dhuluma na maadili mabaya. "Na akakumbuka jina la Mola wake Mlezi, na akaswali." Yaani, alisifika na sifa ya kumkumbuka Mwenyezi Mungu, na moyo wake ukajaa hayo, kwa hivyo matendo hayo yakamsababishia kufanya anayoridhia Mwenyezi Mungu, hasa swala, ambayo ndiyo kipimo cha imani. Hii ndiyo maana ya Aya hii. Na ama aliyeifafanua kauli yake: "aliyejitakasa;" yaani, kutoa Zakaatul-Fitr. "Na akakumbuka jina la Mola wake Mlezi, na akaswali" kwamba ni swala ya Idi, basi hata ikiwa maana hizi zimejumuishwa katika maneno ya aya hizi na ni baadhi yake, hiyo siyo maana yake ya pekee.

# {16 - 17} "Lakini nyinyi mnakhiari maisha ya dunia" kuliko ya Akhera, na kuchagua neema zake zenye dhiki na za kupita tu. "Na Akhera ni bora na yenye kudumu zaidi" kwa maana ndiyo nyumba ya kudumu milele, nayo dunia ni makazi ya kwisha. Kwa hivyo Muumini mwenye akili timamu hachagui lililo baya zaidi kuliko lililo bora zaidi, na wala hauzi starehe ya saa moja na akaacha raha ya milele, kwani kuipenda dunia na kuipendelea kuliko akhera ndicho kichwa cha kila dhambi.

# {18 - 19} "Hakika haya" mliyotajiwa katika Sura hii iliyobarikiwa ya maamrisho mema na habari nzuri "yamo katika Vitabu vya mwanzo. Vitabu vya Ibrahimu na Musa." Ambao ndio Mitume watukufu zaidi baada ya Muhammad - rehema na amani za Mwenyezi Mungu ziwe juu yao wote. Kwa hivyo haya ni maamrisho yaliyo katika kila sheria; kwa sababu yanarudi katika masilahi ya nyumba zote mbili, na ni masilahi katika kila wakati na mahali.

Imekamilika, na sifa njema ni za Mwenyezi Mungu.

* * *