Tafsiri ya Surat Al-Ikhlas

Ilishuka Makka

Kwa jina la Mwenyezi Mungu, mwingi wa rehema, mwingi wa kurehemu

1. Sema: Yeye Mwenyezi Mungu ni wa pekee. 2. Mwenyezi Mungu Mkusudiwa. 3. Hakuzaa wala hakuzaliwa. 4. Wala hana anayefanana naye hata mmoja.

# {1} Yaani, "Sema" kauli uliyo na uthabiti nayo, ukiitakidi, huku ukijua maana yake: "Yeye Mwenyezi Mungu ni wa pekee" na hakuna mwingine kando naye katika upekee na katika ukamilifu, ambaye ana majina mazuri zaidi, sifa kamilifu za juu kabisa, na vitendo vitakatifu, ambaye hana aliyelingana naye wala anayefanana naye.

# {2} "Mwenyezi Mungu Mkusudiwa" katika mahitaji yote. Wakazi wa ulimwengu wa juu na wa chini wanamuhitaji sana Yeye. Wanamwomba mahitaji yao na kumkimbilia katika mambo yao. Kwa sababu Yeye ndiye Mkamilifu katika sifa zake, ajuaye zaidi ambaye ni mkamilifu katika elimu yake, Mvumilivu zaidi ambaye [amekamilika] katika ustahimilivu wake, Mwingi wa kurehemu ambaye ni mkamilifu katika rehema yake, ambaye rehema yake imekienea kila kitu... na vivyo hivyo katika sifa zake zote.

# {3} Miongoni mwa ukamilifu wake ni kwamba "Hakuzaa wala hakuzaliwa" kwa sababu ya ukamilifu wa kujitosheleza kwake.

# {4} "Wala hana anayefanana naye hata mmoja" si katika majina yake, wala katika sifa zake, wala katika vitendo vyake. Ni Mtakatifu, Mtukufu. Sura hii inajumuisha kuyapwekesha majina ya Mwenyezi Mungu na sifa zake.

* * *