Tafsiri ya Surat Al-Falaq

Ilishuka Makka

Kwa jina la Mwenyezi Mungu, mwingi wa rehema, mwingi wa kurehemu

1. Sema: Najikinga kwa Mola Mlezi wa mapambazuko. 2. Na shari ya alivyoviumba. 3. Na shari ya giza la usiku liingiapo. 4. Na shari ya wanaopulizia mafundoni. 5. Na shari ya hasidi anapohusudu.

# {1} Yaani, "Sema" kwa kutafuta hifadhi: "Ninajikinga kwa Mola Mlezi wa mapambazuko." Pia ilisemekana kwamba maana yake ni mpasuaji mbegu na kokwa zikachipua.

# {2} "Kutokana na shari ya alivyoviumba" Haya yanajumisha vyote alivyoviumba Mwenyezi Mungu, wakiwemo wanadamu, majini na wanyama. Kwa hivyo, inatafutwa kinga ya Muumba wake kutokana na shari iliyomo ndani ya vyote hivyo.

# {3} Kisha akasema maneno mahususi baada ya kusema maneno ya jumla "Na kutokana na shari ya giza la usiku liingiapo" na wakaenea humo pepo wengi waovu na wanyama wenye madhara.

# {4} "Na kutokana na shari ya wanaopulizia mafundoni." Nao ni wachawi wa kike wanaotafuta msaada juu ya uchawi wao kwa kupuliza mafundoni wanayofunga kwa ajili ya kufanya uchawi.

# {5} "Na kutokana na shari ya hasidi anapohusudu." Naye ni kila anayetaka neema iondolewe kwa yule anayemhusudu. Kwa hivyo akatafuta kuiondoa kwa kutumia njia yoyote awezayo. Basi ikahitaji kutafuta hifadhi kwa Mwenyezi Mungu kutokana na uovu wake na kubatilisha njama yake. Pia anaingia hapa mtu mwenye kijicho. Kwa sababu kijicho hakitokei isipokuwa kwa mtu hasidi mwenye tabia ya uovu, mwenye nafsi chafu. Sura hii inajumuisha kutafuta hifadhi kutokana na kila aina ya uovu kwa ujumla na kwa njia mahususi. Na inaonyesha kwamba uchawi ni jambo la uhakika, unaoogopwa madhara yake, na mtu anapaswa kutafuta hifadhi kwa Mwenyezi Mungu kutokana nao na kutokana na watu wa uchawi.

* * *