Tafsiri ya Surat Al-Fil

Ilishuka Makka

Kwa jina la Mwenyezi Mungu, mwingi wa rehema, mwingi wa kurehemu

1. Kwani hukuona jinsi Mola wako Mlezi alivyowatenda wale wenye tembo? 2. Kwani hakujalia vitimbi vyao kuharibika? 3. Na akawapelekea ndege makundi kwa makundi. 4. Wakiwatupia mawe ya udongo wa Motoni. 5. Akawafanya kama majani yaliyoliwa!

# {1 - 5} Yaani: Je, hukuona katika uweza wa Mwenyezi Mungu, na ukuu wa jambo lake, na rehema zake kwa waja wake, na ushahidi wa upweke wake, na ukweli wa Mtume wake [Muhammad] - rehema na amani zimfikie - kile ambacho Mwenyezi Mungu aliwafanyia watu wa tembo, ambao waliifanyia njama Nyumba yake Takatifu, na wakataka kuiharibu. Kwa hivyo wakajitayarisha kwa ajili ya hayo, na wakachukua pamoja nao tembo kwenda kuibomoa, wakaja na kundi ambalo Waarabu hawakuwa na uwezo wa kukabiliana nalo kutoka Uhabeshi na Yemeni. Walipofika karibu na Makka - na Waarabu hawakuwa na ulinzi, na watu wa Makka wakaondoka Makka kwa kujihofia nafsi zao kwa sababu yao, basi Mwenyezi Mungu akawatumia ndege makundi kwa makundi, huku wakibeba mawe ya udongo yaliyotiwa moto kutoka Motoni, wakawatupia hayo, na yakawafuatilia wa mbali wao na wa karibu wao, kwa hivyo wakafa na kuzimia, na wakawa kama majani yaliyoliwa, na Mwenyezi Mungu akawatosheleza watu wa Makka kutokana na maovu yao, na akazirudisha njama zao kooni mwao, na kisa chao hiki kinajulikana sana, na huo ndio mwaka aliozaliwa Mtume wa Mwenyezi Mungu – rehema na amani ziwe juu yake – na hilo likawa miongoni mwa dalili za wito wake na ushahidi wa ujumbe wake. Basi sifa njema na shukrani ni za Mwenyezi Mungu.

* * *