Tafsiri ya Surat Al-Humaza

Ilishuka Makka

Kwa jina la Mwenyezi Mungu, mwingi wa rehema, mwingi wa kurehemu

1. Ole wake kila safihi, msengenyaji! 2. Aliyekusanya mali na kuyahesabu. 3. Anadhani ya kuwa mali yake yatambakisha milele! 4. Hasha! Atavurumishwa katika Hut'ama. 5. Na nani atakujuvya ni nini Hut'ama? 6. Moto wa Mwenyezi Mungu uliowashwa. 7. Ambao unapanda nyoyoni. 8. Hakika huo utafungiwa nao. 9. Kwenye nguzo zilizonyooshwa.

# {1} "Ole wake." Yaani, hili ni tishio kali la adhabu kwa "kila safihi, msengenyaji" ambaye huwabeza watu kwa vitendo vyake na kuwatweza kwa maneno yake.

# {2} Miongoni mwa sifa za mtwezaji huyu kwa vitendo na kauli ni kuwa hana jambo muhimu isipokuwa kukusanya mali, kuzihesabu na kufurahia kwazo, na hana hamu ya kuzitumia katika mambo ya heri, kudumisha mafungamano ya kifamilia na mfano wa hayo.

# {3} "Anadhani" kutokana na ujinga wake "ya kuwa mali yake yatambakisha milele" katika dunia hii, na ndiyo maana taabu yake na juhudi zake zote zilikuwa katika kukuza mali yake, ambayo anadhania kuwa inamwongezea umri wake, wala hakutambua kwamba ubahili huharibu umri na kubomoa makazi, na kwamba wema huongeza umri.

# {4 - 7} "Hasha! Atavurumishwa katika Hut'ama.Na nani atakujuvya ni nini Hut'ama?" Hii ni mbinu ya kuonyesha ukubwa na ukali wa jambo lake. Kisha akaifafanua kwa kauli yake: "Moto wa Mwenyezi Mungu uliowashwa." Ambao kuni zake ni watu na mawe. "Ambao" kutokana na ukali wake "unapanda nyoyoni."

# {8 - 9} Na pamoja na joto hili kali, watanaswa humo, na watakuwa wamekata tamaa mno ya kutoka humo, na ndiyo maana akasema: "Hakika huo utafungiwa nao. Kwenye nguzo zilizonyooshwa" nyuma ya milango yake; ili wasitoke humo. "Kila wakitaka kutoka humo, watarudishwa humo humo." Tunajikinga kwa Mwenyezi Mungu kutokana na hayo, na tunamuomba msamaha na salama.

* * *