Tafsiri ya Surat Al-Adiyat

Ilishuka Makka

Kwa jina la Mwenyezi Mungu, Mwingi wa rehema, Mwingi wa kurehemu

1. Ninaapa kwa farasi wendao mbio wakipumua. 2. Na wakitoa moto kwa kupiga kwato zao chini. 3. Wakishambulia wakati wa asubuhi. 4. Huku wakitimua vumbi. 5. Na wakijitoma kati ya kundi. 6. Hakika mwanadamu ni mtovu wa fadhila kwa Mola wake Mlezi! 7. Na hakika yeye mwenyewe bila ya shaka ni shahidi wa hayo! 8. Naye hakika bila ya shaka ana nguvu za kupenda mali! 9. Kwani hajui watakapofufuliwa waliomo makaburini? 10. Na yakakusanywa yaliomo vifuani? 11. Kuwa hakika Mola wao Mlezi siku hiyo bila ya shaka atakuwa na habari zao wote!

# {1} [Mwenyezi Mungu Mtakatifu] na Mtukufu aliapa kwa farasi; kwa sababu ya ishara zake zinazong'aa na neema zake za dhahiri zinazojulikana kwa viumbe, na Mwenyezi Mungu Mtukufu akaapa kwa hao katika hali ambayo hakuna aina nyingine ya wanyama wanaoshiriki nao, akasema: "Ninaapa kwa farasi wendao mbio wakipumua" kwa pumzi inayosikika.

# {2} "Na wakitoa moto kwa kupiga kwato zao chini" juu ya mawe wanayoyakanyaga kwa sababu ya kwato zao ngumu.

# {3} "Wakishambulia" maadui "wakati wa asubuhi."

# {4 - 5} "Huku wakitimua vumbi" juu ya adui zao wanapowavamia. "Na wakijitoma kati ya kundi."

# {6} Kinachoapwa kwa sababu yake hapa ni kauli yake: “Hakika mwanadamu ni mtovu wa fadhila kwa Mola wake Mlezi!" Bali maumbile yake ni uvivu na kunyima haki za kimali na za kimwili zilizo juu yake. Isipokuwa wale ambao Mwenyezi Mungu amewaongoza na wakaondoka kwenye sifa hii hadi kwenye sifa ya kuruhusu kutimiza haki.

# {7} "Na hakika yeye mwenyewe bila ya shaka ni shahidi wa hayo." Yaani mtu, licha ya yale anayoyajua yeye mwenyewe ya kuzuia na kutotosheka, ni shahidi mno wa hili na halikatai wala halikanushi. Kwa sababu hilo ni jambo lililo wazi, na inawezekana kwamba maana ya "Yeye" ni Mwenyezi Mungu. Yaani hakika mja ni mtovu wa fadhila kwa Mola wake Mlezi, naye Mwenyezi Mungu ni shahidi mno wa hilo. Kwa hivyo maana hii inakuwa na tishio kali kwa yule ambaye ni mtovu wa fadhila kwa Mola wake Mlezi kwamba Mwenyezi Mungu ni shahidi mno juu yake.

# {8} "Naye;" yaani mwanadamu, "hakika ana nguvu za kupenda mali." Kuipenda kwake huku ndiko kulikomfanya kuacha kutekeleza haki zinazomstahiki kutekeleza. Kwa hivyo akatanguliza matamanio yake kuliko radhi za Mola wake Mlezi, na yote hayo ni kwa sababu aliyaelekeza macho yake katika nyumba hii peke yake, na akapuuza maisha ya Akhera.

# {9 - 10} Ndiyo maana akasema akimhimiza kuiogopa Siku ya Miadi, "Kwani hajui" huyu aliyedanganyika, “watakapofufuliwa waliomo makaburini?" Yaani, Mwenyezi Mungu atakapowatoa wafu makaburini mwao ili awakusanye na kuwafufua, "Na yakakusanywa yaliyomo vifuani" ya heri na ouvu, kwa hivyo siri ikawa kama jambo la dhahiri, nalo la ndani likadhihirika, na matokeo ya matendo yao yakawa wazi mbele ya nyuso za viumbe?

# {11} "Kwa hakika Mola wao Mlezi siku hiyo bila ya shaka atakuwa na habari zao wote" za dhahiri na zilizofichika, na atawalipa kwa hayo. Na ametaja kwamba anazo habari zote siku hii haswa pamoja na kwamba Yeye anazijua kila wakati, kwa sababu kinachokusudiwa hapa ni kulipa juu ya matendo yanayotokana na elimu na ujuzi wa Mwenyezi Mungu.

* * *